Volunteer
Shopनयाँ वर्षः आफूले वास्तवमै चाहेको कुरा सृजना गर्नुहोस्
नयाँ वर्ष, जीवनका नयाँ दृष्टिहरूको निम्ति एउटा अवसर र सम्भावना हो । त्यस्तो व्यक्ति नै धन्य हुन्छ, जोसँग यहाँ र यहँभन्दा परको स्पष्ट दृष्टि हुन्छ ।
आउँदो वर्षको लागि, यो नयाँ वर्षमा तपाईंले के गर्ने सोच्नुभएको छ ? आफूले जे गर्न खोज्दै हुनुहुन्छ, त्यसको निधो गर्नुहोस् । तपाईं जे गर्न चाहनुहुन्छ, त्यसको लागि एउटा खाका कोर्नुहोस्, जसले तपाईंलाई यो बताउनेछ कि अर्को एक वर्षमा तपाईं आफूलाई अहिलेको भन्दा अझ राम्रो मानिस बनाउनु हुनेछ । सम्भव भएसम्म सबै तरिकाले अझ सुन्दर मानिस, जो बढी आनन्दित, बढी शान्त, बढी स्नेही हुनेछ ! यति त तपाईं आफैँले निधो गर्नुपर्छ । यदि तपाईंले आफू वरपरको संसारलाई महसुस गर्नुभयो भने, अर्थात् यो मानव संसारलाई महसुस गर्नुभयो भने, तपाईंले विभिन्न आवाजहरू, विचारहरू र भावनाहरूको कर्कश ध्वनि मात्र अनुभव गरिरहनु भएको हुन्छ । यी आवाजहरू, विचारहरू अनि भावनाहरू मानिस विभिन्न तहको दुविधा र अन्योलको स्थितिमा हुँदा प्रकट भएका हुन्छन् । वर्तमानको वास्तविकता जे हो, त्यसबारे रहेको निकै अधुरो-अपुरो बुझाइबाट नै यी आवाजहरू, विचारहरू र भावनाहरू निर्मित हुन्छन् र व्यक्त गरिन्छन् । जब व्यक्ति यस हदसम्म अन्योलमा हुन्छ, जब ऊ आफू वरपरको वास्तविकताको बारेमा रहेका मिथ्या र भ्रमपूर्ण धारणाहरूको अधीनमा हुन्छ, तब उसले आफू स्वयं र वरपरका मानिसहरूका लागि उत्पन्न गर्ने पीडा र दुःख निकै दुर्भाग्यपूर्ण हुन्छ ।
हाम्रो वरपर यतिखेर जे वास्तविक हुन्छ, हामी जहिल्यै त्यसैको आधारमा आफ्नो जीवन निर्माण गर्ने प्रयास गरिरहेका हुन्छौँ । यस क्षणमा हामीसँग चाहे जेसुकै भएपनि त्यसले कुनै महत्त्व राख्दैन । हामी भोलि कहाँ जान चाहन्छौँ भन्ने कुरा आज हामी कहाँ छौ भन्ने कुरासँग सम्बन्धित हुन जरूरी छैन । हामी आफ्नो जीवनमा सबैभन्दा उच्च के चाहन्छौँ भन्ने कुरालाई हाम्रो हालको परिस्थितिले निर्धारण गर्न आवश्यक छैन । यदि हामीले आफ्नो दृष्टिलाई अहिलेको परिस्थितिको दास बनायौँ भने, हामी आफूलाई पुनः एकपटक सजिलै पाउन सकिने, सामान्य अनि आफ्नो निम्ति सम्भव भएका कुराहरूमा समायोजन गर्नेछौँ । के सम्भव छ र के सम्भव छैन भनेर सोच्न जरूरी छैन । तपाईंले आफ्नो जीवनमा खोज्न सक्ने सर्वोच्च कुरा के हो, तपाईं कत्तिको दूरदर्शी हुनुहुन्छ भन्ने कुरालाई देख्न सक्नु नै सबैभन्दा बढी महत्त्वपूर्ण हुन्छ ।
यदि व्यक्तिले आफ्नो लागि र आफू वरपरको संसारको लागि गर्न चाहेको कुरालाई स्पष्ट रूपमा देख्न सक्ने हो भने, त्यो कुरा सृजना गर्नु उसको क्षमताभन्दा पर हुँदैन । त्यो कि त यही जीवनकालमा हुन सक्छ वा अरू केही जीवनकालहरू लाग्न सक्ला, तर चाहेको कुरा निश्चय नै पूरा हुनेछ । जो व्यक्तिमा आफ्नो जीवनको दृश्य स्पष्ट हुन्छ अनि यदि ऊ आफ्नो जीवनको प्रत्येक क्षण त्यही मात्र खोजिरहन्छ भने, सबैभन्दा उच्च मानिएको कुरा पनि उसको सामु झुक्नेछ । तर, एउटा व्यक्ति अनेकौँ भ्रम र दुविधाहरूको डङ्गुर लिएर बाँचिरहेको हुन्छ, उसले अधिकांश समय आफूले नचाहने कुराहरू मात्रै खोजिरहेको हुन्छ— जसकारण, आफूले वास्तवमै चाहेको कुरा उसले कहिल्यै पाउँदैन । व्यक्तिको जीवनमा दूरदर्शिता (पछिसम्मको कुरा देख्ने क्षमता) र इच्छाशक्ति नहुनुको मूल कारण के हो भने, उसले आफू वरपरको संसारलाई गलत रूपमा बुझेको हुन्छ ।
तपाईंलाई जुन कुरा सबैभन्दा उच्च लाग्छ, त्यसैको खोज गर्नुहोस् । त्यो पूरा हुन्छ वा हुँदैन भन्ने कुराले केही फरक पार्दैन, किनकि मानिसको निम्ति त्यो दूरदृष्टि लिएर बाँच्नु आफैँमा समृद्ध पार्ने, आनन्द प्रदान गर्ने अनि सर्वोपरि मुक्त गर्ने प्रक्रिया बन्दछ । त्यो भोलि नै पूरा हुन्छ वा सय वर्षपछि भन्ने प्रश्नले महत्त्व राख्दैन । सबैभन्दा महत्त्पूर्ण कुरा के हो भने यदि तपाईंमा दूरदृष्टि छ भने, त्यस स्थितिमा कुनै कुरा सम्भव छ कि असम्भव, सजिलो छ कि अप्ठ्यारो, पहुँचमा छ कि पहुँचभन्दा बाहिर भन्ने कुरालाई लिएर तपाईं चिन्तित बन्नुहुन्न । यहाँ सम्म कि त्यो कुराको अन्तिम नतिजा के होला भन्नेप्रति तपाईंमा कुनै चासो हुँदैन । तपाईंमा दूरदृष्टि हुनु अनि त्यसमै आफ्नो जीवन समर्पित गर्नु बढी महत्त्वपूर्ण हुन्छ । परम प्रकृतिसम्म पुग्नको लागि पनि सबैभन्दा सजिलो तरिका यही हो— केही होला कि नहोला भन्ने कुराप्रति कुनै सरोकार नराखिकन आफूले चाहेको कुराप्रति आफूलाई पूर्णतः समिर्पित गर्नु ! यो आफैँमा एउटा आध्यात्मिक प्रक्रिया हो ।
आफूभित्र र आफूबाहिर रहेका सीमाहरू पार गर्ने महत्त्वपूर्ण तरिका भनेकै दूरदृष्टि हुनु हो । यदि कोही व्यक्ति आफूमा दूरदर्शिता र इच्छाशक्ति विकसित गर्नुपर्ने बोझ नलिइकनै यहाँ बाँच्न चाहन्छ भने, त्यस्तो व्यक्ति पूर्णतया निर्दोष र अबोध हुनुपर्छ । त्यस्तो व्यक्ति मात्र यहाँ यत्तिकै रहन सक्छ— उसलाई दूरदृष्टि चाहिँदैन । यदि उसमा अलिकति पनि दम्भ छैन र एउटा बच्चा जस्तै पूर्णतया अबोध छ भने, उसमा कुनै पनि चीजप्रति इच्छाशक्ति हुनुपर्दैन । यदि त्यस्तो छैन भने, मानिसले दूरदृष्टि लिएर बाँच्नु निकै महत्त्वपूर्ण हुन्छ ।
हामीले अहिलेको निम्ति मात्र नभई पछिसम्मको लागि पनि वास्तवमै जे चाहेका हौँ, त्यसको लागि आफूभित्र एउटा दूरदृष्टि निर्माण गर्ने समय भइसकेको छ । यदि तपाईंले गहिराइमा हेर्नुभयो भने, तपाईंको दूरदृष्टि सदैव सार्वभौमिक हुनेछ अर्थात् सबैलाई समावेश गर्ने किसिमको हुनेछ । जीवनको यात्रामा सबैथोक पूरा हुन्छन् वा हुँदैनन् भन्ने कुरा महत्त्वपूर्ण होइन । जुन कुरा तपाईंको निम्ति सबैभन्दा उच्च छ, त्यसबाट अलकिति पनि विचलित नभइकन त्यसकै खोज गर्नुहोस् । यो जीवनलाई जान्ने एउटा सरल तरिका हो— जे यहाँ छ अनि जे यहाँभन्दा पर छ !